काठमाडौं । अमेरिकी सेनाको २२ सदस्यीय टोली काठमाडौं आएको छ । अमेरिकी सेनाको टोली सोमबार काठमाडौं आइपुगेको हो । नेपाली सेना र अमेरिकी सेनाबीच हुने तीन दिने छलफलका लागि अमेरिकी सेना नेपाल आएको हो ।आज सोमबारदेखि १५ गतेसम्म दुइपक्षीय सैन्य छलफल हुँदैछ । सन् २०१८ देखि हरेक वर्ष आयोजना हुँदै आएको बैठकमा यो बर्ष शान्ति सुरक्षा, मानवीय सहायता, विपद व्यवस्थापन र विषयवस्तु विज्ञताको आदान प्रदानमा केन्द्रीत हुने नेपाली सेनाले जनाएको छ ।
छलफलमा नेपालकोतर्फबाट परराष्ट्र मन्त्रालय, अर्थ मन्त्रालय र रक्षा मन्त्रालयका सहसचिव र उपसचिवसहित नेपाली सेनाका उपरथीको नेतृत्वमा १४ सदस्यीय टोली सहभागी हुने सेनाले जनाएको छ । नेपाली टोलीको नेतृत्व उपरथी अशोकराज सिग्देलले गर्ने तय भएको छ ।अमेरिकी सेनाकोतर्फबाट प्यासिफिक कमाण्डका डेपुटी कमाण्डर मेजर जनरल क्रिस्टोफर स्मिथले टोलीको नेतृत्व गर्नेछन् । दैनिक नेपाल