विकासको दृष्टिले मुलुककै अग्रस्थानमा रहेको रुपन्देही जिल्लाको पूंजिगततर्फ आधा भन्दा बढी बजेट फ्रिज भएको छ । असार महिनाको अन्त्य सम्ममा पनि बिनियोजित रकम खर्च गर्न नसक्ने धेरै कार्यालयहरु रहेका छन् ।आर्थिक बर्ष २०७८÷०७९ मा रुपन्देहीमा रहेका संघिय कार्यालयहरुमा असार ३० गते सम्म कुल विनियोजित बजेटको ८६ दशमलव ५२ प्रतिशत खर्च भएको छ । कोष तथा लेखा नियन्त्रक कार्यालय भैरहवाले दिएको जानकारी अनुसार रुपन्देही जिल्लामा ४३ अर्ब ५५ करोड ३७ लाख बजेट बिनियोजन भएकोमा त्यस मध्ये ३७ अर्ब ६८ करोड ४० लाख २२ हजार मात्र खर्च भएको छ ।
कुल बजेट मध्ये चालु तर्फ ३४ अर्ब १२ करोड ५८ लाख ५५ हजार रुपैया बिनियोजन गरिएको थियो । जसको ९७ दशमलव ९४ प्रतिशत खर्च भएको छ । यसै गरि पूंजिगत तर्फ ४५ दशमलव १८ प्रतिशत मात्र खर्च भएको छ ।चालुको करिब एक चौथाई मात्र पूंजिगत बजेटमा छुट्टयाउनु र यसमा पनि आधा पनि खर्च गर्न नसक्दा जिल्लामा बिकास निर्माणका काम प्रभावित भएका छन् । कोष तथा लेखा नियन्त्रक कार्यालय रुपन्देहीले उपलब्ध गराएको तथ्यांक अनुसार अलि ठूलै कारोबार हुने संघिय कार्यालयहरुको पूंजिगत तर्फको खर्च सन्तोषजनक देखिन्न । पंूजिगत खर्च तर्फ नै अख्तियार दुरुपयोेगा अनुसन्धान आयोगको कार्यालय बुटवलले पनि बर्ष भरि खर्च गरेको रकमको आधा रकम असार महिनामै खर्च गरेको छ । रुपन्देही जिल्लामा १ सय ३४ कार्यालयहरुलाई कोष तथा लेखा नियन्त्रक कार्यालय भैरहवाले बजेट निकासा दिने गरेको छ भने स्थानिय तह समेत गरि ९९ वटा कार्यालयहरु मार्फत राजस्व असुली हुने गरेको छ ।